Так называлася інтэрактыўная пляцоўка Барысаўскай цэнтральнай раённай бібліятэкі ім. І.Х. Каладзеева на свяце да Дня Дзяржаўнага флага, Дзяржаўнага герба і Дзяржаўнага гімна Рэспублікі Беларусь. Гэтае свята жыхары і госці Барысаўшчыны адзначылі 10 мая, сабраўшыся на тэрыторыі каля Палаца культуры ім. М. Горкага.
Святкаванне пачалося з унясення шаснаццаціметровага палотнішча Дзяржаўнага флага і Дзяржаўнага герба нашай краіны кадэтамі Барысаўскага кадэцкага вучылішча Мінскай вобласці. Права падняць Дзяржаўны флаг Рэспублікі Беларусь было дадзена навучэнцу гімназіі № 1 г. Барысава Сцяпану Лінніку і навучэнцы сярэдняй школы №22 Ксеніі Лютаровіч. Да прысутных потым звярнуўся старшыня Барысаўскага райвыканкама Мікалай Карповіч. Ад імя маладога пакалення Барысаўскага раёна клятву вернасці дзяржаўным сімвалам Рэспублікі Беларусь вымавілі выпускнікі сярэдняй школы №16 г. Барысава імя І. В. Барысюка. Пасля пачаліся святочны канцэрт і праца выставачных пляцовак.
Як і 9 мая, пляцоўка супрацоўнікаў бібліятэкі Каладзеева прыцягвала дарослых і дзяцей разнастайнымі формамі занятасці і карысных забаў.
Так, можна сказаць, дзейнічала цэлая серыя майстар-класаў:
— «Кукла-Кувадка» – па стварэнні лялькі-абярэга ў колеры флага Беларусі і паштоўкі з выявай лялек-абярэгаў;
— «Беларусь – мая краіна» – па вырабе ўпрыгожвання-магніта ў форме контуру Беларусі;
— «Блакітная валошка – сімвал маёй краіны» – па стварэнні магніта-ўпрыгожванні ў выглядзе васілька;
— «Сімвал маёй Беларусі – Буслік» – па вырабе сваімі рукамі бусла, сімвала нашай краіны.
Майстар-класы былі вельмі папулярныя сярод удзельнікаў любога ўзросту. Прыемна адзначыць, што «на агеньчык» нашай пляцоўкі зазірнулі таксама начальнік аддзела ідэалагічнай працы і па справах моладзі Барысаўскага райвыканкама Таццяна Чуйкова, намеснік старшыні Барысаўскага райвыканкама Ягор Мандрык, начальнік аддзела культуры Барысаўскага райвыканкама Наталля Скакун і інш. Сабе на памяць яны зрабілі лялькі-кувадкі і ўпрыгожанні-магніты.
Бібліятэкары таксама прапаноўвалі ўдзельнікам мерапрыемства пагуляць – хутка скласці пазлы «Сімвалы маёй краіны» i «Беларусь. Гісторыя і сучаснасць».
У гэты дзень нашу пляцоўку суправаджала і адпаведная кніжная выстаўка з каментарыямі аб дзяржаўных сімвалах Рэспублікі Беларусь «Сімвалы маёй краіны».
